WELCOME TO OCM WEBSITE

Yaamicha Kora SDO-OCM International

USA, Minnesota
Waxabajjii 20, bara 2008
Lakk. 009/Wax/2008
Irraa: SDO-OCM International
Gara: Ummata_Oromoo
From Department of OCM International Organization & Strategic Policy Affairs READ

IBSA IJJANNOO SOCHII DAMMAQIINSA OROMUMMAA IRRAA

Caamsaa 27, 2008

Duullii sanyii duguuggii kan Waayyaanneen oromiyaa dhuunfachuuf ummata Oromoo irratti gaggeessaa jirtu hatattamaan dhaabbachuu qaba!!

Akeekni gabroomfataa habashaa ummata Oromoo biyya isaa irraa buqqisuudhaan, yookaan ammoo, yoo danda'ameef sanyii oromoo lafarraa duguuguudhaan Oromiyaa dhuunffachuu akka tahe, dararaan waggaa 100 ol ummata oromoo irra gayaa jiru ragaa baya.

Akeeka kana karooraan yeroo dheeraa keessatti fiixa baasuuf jecha, gabroomfataan habashaa martuu ummata oromoo biyya isaa irraa buqqisaa, hiyyummaa, beela, dhukkubaa fi doofummaa irratti dagaagsaa, lubbuu ilmaan Oromoo qusannoo tokko malee qisaasaa Oromiyaa irratti umrii gabrummaa waggaa dhibbaa ol lakkaawwachuu isaa seenaan ragaa baya.

Dhaadannoo Meles Zenawi, kan "Ummata Oromoo saba guddeessa tahuu irraa saba bicuutti gadi buusna" jedhu karooraan hojitti hiikuuf jecha, Waayyaaneen, ummata Oromoo beelaan, dhukkubaa fi ajjeechaan lafarraa duguuguu bira kuttee, kan lubbuun jirullee maqaa „misooma" fi „investment" jedhuun biyya isaa irraa buqqisuu waggaa 17 oliif itti fuftee jirti. Kana irrattis dabalee, ummata oromoo fi ummatoota ollaa isaa jiraatan jiddutti lola cubbuu kakaasuudhaan, lubbuu fi qabeenya miliyoona heddutti tilmaamu barbadeessuu itti fuftee jirti.

Nuti miseensonni Sochii Dammaqiinsa Oromummaa, duula sanyii duguuggii kan Waayyaaneen waggaa 17 ol ummata Oromoo irratti adeemsisaa jirtu kana gadi fageenyaan xiinxalluu fi hubachuudhaan :

1) Jaarmayoonni Oromoo kan biyya keessaa fi biyya alaa keessatti mirga ummata Oromoo kabajchiisuuf qabsaawan hundi, akeeka gabroomfataan habashaa sanyii oromoo lafarraa duguuguudhaan oromiyaa dhuunfachuuf baafatee waggaa 100 ol ummata oromoo irratti adeemsisaa jiru kana, afaaniif irree tokkoon akka afoo dhaabbatan ni gaafanna. Garaagarummaa xiqiqqoo isaan jidduu jirtu tarreessuu qofaan umrii lakkaawwachuu dhiisanii afaan tokkoon ummata oromoo ijaaruu fi hidhachiisuudhaan qabsoo bilisummaa finiinsuudhaan hundee Waayyaannee buqqisuu irratti akka xiyyeeffatan gaafanna. Nullee, dirqama nurraa eeggamuu hundaan isin bira ni dhaabanna.

2) Hayyoonni Oromoo kan biyya keessaa fi biyya alaa jiran hundi, badii Waayyaaneen ummata keenyarratti adeemsisaa jirtu kana gadi fageennyaan hubachuudhaan, saboota, mootummootaa fi jaarmayoota biyya keessa jiraatanii hundatti roorroo saba Oromoo irra gayaa jirtu sagalee tokkoona akka iyyatan kabajaan gaafanna, waamicha lammummaa goonaaf.

3) Lammiin oromoo hundi, bakka jiru hundaa wal waamee, wal ijaaree, ijaaramee, duula sanyii duguuggii kan Waayyaaneen ummata keenyarratti adeemsisftu kana, fuullee hundaan akka afoo dhaabbatu kabajaan gaafanna.

4) Waayyaaneen tooftaa "investment" fi „misooma" jedhuun ummata Oromoo: Harargee, Arsii, Baale, Gujii, Wallaga, Boorana, Waltajjii oromiyaa, ... fi kfk. irraa buqqisaa jirachuun beekkamaadha. Badii Waayyaaneen ummata keenyarratti adeemsimftu kana balaaleffataa, ummanni Oromoo haala diinummaa kan Waayyaaneen isarratti adeemsiftu kana gadi fageenyyaan hubachuudhaan, qabsoo isaa fuullee hundaan finiinsee mirga isaa akka kabajchiifatu itti dhaamanna, karaa hundaan qabsoo isaa bira dhaabbannas.

5) Ummanni Oromoo fi ummatoonni ollaa isaa jiraatan hundi, shira Waayyaanneen umrii isii dheereffachuuf ummatoota jiddutti xaxxu irratti dammaqee seetee Waayyaaneen isaan jiddutti uumtu hundaa aadaa isaatiin furataa, karoora Waayyaannee fashalsuun nagayaa fi ollooma gaariin akka waliin jiraatan itti dhaamanna.

6) Mootumoonni Addunyaa fi jaarmayoonni mirga namoomaatiif dhaabbatan hundi, duula sanyii duguuggii kan Waayyanneen ummata oromoo irratti adeemsisaa jirtu afoo dhaabbachuun lubbuu ummata oromoo badii irraa akka baraaran kabajaan gaafanna.

7) Tokkummaan Mootummoota Addunyaa (UN) badii Waayyaaneen ummata Oromoo adeemsiftu kana balaaleffattee ummata oromoo kan qe'ee isaa irraa afaan qawweetiin buqqifame gargaarsaan akka dhaqqabu kabajaan gaafanna. Kana irrattis dabalee, qaama walabaa badii Waayyaaneen ummata Oromoo irratti adeemsiftu kana qoratu akka ramadu kabajaan gaafanna.

8) Dhumarrattis, duula shanyii duguuggii kan Waayyaaneen ummata Oromo irratti adeemsiftu irra-dedeebinee balaaleffataa, jeequmsa sababaa kanaan dhalatu hundaaf itti gaafatamtuun Waayyaanee qofa tahuu akeekaa, sab-lammoonni ollaa ummata Oromoo jiraatan hundi jeequmsa waayyaaneen uumtu hunda akka afoo dhaabbatan wamichaa oboleeyumma goonaaf, (dhiiyeesinnaaf).

Tokkummaan Humna!

Oromummaan Kufne, Oromummaan Kaana!

Oromoon ni mooya!
Koonfaransa Idil-Addunyaa Qabsoo Bilisummaa fi Walabummaa Oromiyaa

Howard University, Washington, DC
Caamsaa 17 – 18, 2008

Murtii fi kutannoolee itti-bahiinsa walgahii TKBO


Waamicha walgahii Tumsi Kaayyoo Bilisummaa Oromoo (TKBO) godhe fudhatuudhaan hawaasni Oromoo, bakka bu'ootni jaarmayooti siyaasaa Oromoo shanii (5) (Adda Bilisummaa Oromoo (ABO), Adda Tokkummaa Bilisummaa Ummata Oromomoo (ATBUO), Adda Walabummaa Dimokraasummaa Oromiyaa (AWDO), Adda Walabummaa Oromiyaa (AWO), Gumii Adda Bilisummaa Ummata Oromoo (GABUO) fi Sochii Dammaqiinsa Oromummaa (SDO/OCM) qooda fudhatuudhaan guyyoota lamaf (2) (Caamsaa 17-18/2008) magaalaa Washington, DC teessuma Howard University keessatti godhame irraa fiixa bahiinsa qabsoo bilisummaa Oromoo, haala yeroo ammaa ummatni Oromoo biyya keessaa fii biyyoota ollaa keessatti irra gahaa jiru, hidhamuun, ajjeefamuun, biyyaa ari'amuun sadarkaa yaaddessaa keessa jiraachuu irratti, kaayyoon qabsoo bilisummaa ummata Oromoo mootummaa Oromiyaa walaba ijaaratuu malee dimokraasummaa sirna Impaayera Itoophiyaa akka hin taane marii babal'aa godhatanii Murtiilee armaa gadii kana irratti walii galanii milkiin xumuratanii jiru.

1. Furmaatni rakkoo saba Oromoo bilisummaa sabaatii fi walabummaa biyya Oromoo qofaan hiikama. Kunis kan mirkanaahuun Humna tokkoon bobbahanii sirna Koloneeffataa abashaa cabsuudhaani.

2. Galiin qabsoo bilisummaa ummata Oromoo bilisummaa saba Oromoo mirkaneessuu waan ta'eef diina keessaafii alaa kanneen gufuu qabsoo bilisummaa Oromoo ta'an dura dhaabbanna!

3. Dhaabbileen Oromoo walabni kanneen walgahii kana irraa qooda fudhatan walii galtee fi gamtaan qabsaawuun yeroo bilisummaa shaffisiisuu isaa hubatanii wajjin qabsaawuuf walii galanii Jiru.

4. Olola diinnan qabsoo bilisummaa Oromoo irratti godhaa jiran sagalee tokkon dura dhaabbachuuf murteeffatanii jiru.

5. Qabsoo bilisummaa Oromoo gamtaan gabbisuun barbaachisaa ta'uun amanamee ULFOn dhaabbachuun ni hubatama, akeeka ULFOn dhaabbateef cimsuuf jabeessuun barbaachisaa ta'uu irratti walii galamaee jira.

6. Walabummaan Oromiyaa qabsoo malee hawwiin hin argamtu; akkasumas Oromoon Bilisa bahuuf humni alaa hin murteessu. Qabsoon bilisummaa Oromoo irree tokkummaa ilmaan Oromoo irratti irkatti. Kanaaf, ilmaan Oromoo hundi qabsoo bilisummaatti dabalamanii akka qabsaawan irra deddeebinee waamicha dhiheessina.

7. Jarmayoota Oromo kan bilisummaa Oromootiif qabsoo godhaa jiran gidduutti wal-amantii cimsuun barbaachisaa ta'uun isaa hubatamee irratti hojjachuuf walii galamee ta'ee jira.

8. Walgahiin marii humnoota mooraa qabsoo bilisummaa Oromoo hunda ammatu tokko yeroo gababaa keessatti akka qophaahu walii galamee jira.

9. Kaayyoo qabsoo bilisummaa Oromoo fiixa baasuuf qoodni dargaggoo fi shamarran Oromoo akka cimu taasisuun barbaachisaa ta'uun isaa hubatamee akka irratti hojjatamu irratti waliif galamee jira.

10. Lafti Oromoo diinaan dhuumfatamaa jira. Ummatni Oromoo biyya abbaa isaa irratti ajjeefamaa, hidhamaa, tumamaa, saamamaa lafa isaa irraa ari'amaa jira. Keessattuu Oromootni biyya alaatii dhaqanii lafa diinni qotee bulaa Oromoo irraa buqqisaa jiru fudhachuun waan nama gaddisiisu. Gocha kana walgahiin kun jabeessee balaaleffata.


Oromiyaan Ni bilisoomti!

Caamsaa 18, 2008
Washington, DC
--
Yaa Rabbi ati Oromoo Gargaari.

 

Ibsa Ijjannoo Xumura-Walgahii SDO Idil-Addunyaa Damee Americaa Bitaa, Teessuma Dallas, Texas-USA

.Bitootessa 23, 2008 Lakk: 01/SDO/2008

Caayaan Sochii Dammaqiinsa Oromummaa walgahii wixinee isa Jalqabaa yeroo duraatiif dhaabbilee Siyaasa Oromoo walaba ta’an, waldaalee Hawaasummaa garaa garaa, Hayyootaa fi Hoogganoota Qabsoo Oromoo, Ummata Oromoo Magaalaa Tana Jiru hirmaachisee Milkiin Xumuratee Jira.

Walgahiin kun akkuma aadaa Oromootti eebba maanguddootiin kan banamee xumurame yoo ta’u itti fufuunis Hundeessitootaa fi gaggeessitootni SDO Birkii Gadaa Melbaa wal duraa duubaan akeeka SDO ibsuu irraa hanga xiinxala gufuulee Qabsoo Bilisummaa Oromoo fi walabummaa Oromiyaa, Furmaata isaa tarreessuuf sagalee tokkoon irratti walii galuu, maqaan malee galiidhaan dhaabbileen Oromoo walaba ta’an akka garaa-garummaa jabaataa hin qabaanne tuqamee Jira. Itti fufuudhaan Dhaamsi Dura Taa’aa ULFO fi FIDO Obbo Jaarraa Abbaa Gadaa, Barreessaa ULFO Obbo Abdusalaam Alii, Hayyuu Qorannoo Wal-dhibdee Professor Hamdeessaa Tusoo, Bakka Buutota Dhaabbilee Siyaasa Oromoo Walabaa, ATBUO-Obbo Jamaal Ibraahim, Itti aanaa hayyuu Kallacha AWO Obbo Karoorsaa Bosonaa, Gaafatamaa Siyaasaa fi Jaarmaya ABO-Gumii Sabaa Obbo Ibraahim Abbaayyee akkasumas Hoogganootni Dhaabbilee Biroo gabaabbina Yerootiif akka hirmaachuu hin dandeenyee fi fuula duraaf akka irratti hirmaatan nu beeksisanii walgahii Milkii akka nuuf ta’u hawwii isaanii deebii xalayaa waamicha afeerrii teenyaaf deebii nuuf erganii Jiru. Walgahii sa’aa 7 oliif taasifame kana Guutuu addunyaa irraa karaa sarara Internet kan Paltalk jedhamuun namootni lakkobsaa heddutti shallagaman haala gammachiisaa naamusaa fi kabaja qabuun hirmaachaa oolanii jiru.

Haaluma kanaan walgahii kana ilaalchisee Murtiilee fi ijjannoo armaan gadii dabarsinee jira. Itti fufa walgahii kana fakkaatuu Birkiileen Gadaa Shanan SDO wal-duraa duubaan Gadaan Birmajii-Kibba Pasific Melbourne, Gadaan Michillee-Oslo Norway Keessatti, Gadaan Melbaa ammas yeroo 2ffaa Minnesota-Minneapolis Keessatti akka qindeessaa jiran hubatamee jira.

1.Ummatni Oromoo akka saba tokkootti, akka ummata hegeree tokko qabuutti, akka ummata afaan tokko dubbatuutti iggitii fi hacuuccaa tokko malee haguuggii dhaabbilee siyaasaa caala Oromummaan haa-dursitu jedhee sabummaa isaatiif dursa kennee hegeree isaa irratti mari’atee akka qabsoo isaa finiinsee galii rukuchiisu waamichi godhame.

2. Dhaabbileen siyaasa Oromoo walaba ta’an garaa garummaa isaan jidduu jirtu xiqqeeffatanii diina waloo irratti waliin bu’aa saba isaaniitiif wajji hojjachuu irraa yoo danda’ame hanga walitti baquutti, akkasumas jireenya maqaa qofa osoo hin taane waan qabatamaa fi mul’ataa tokkoon akka yeroo gabaabaa keessa ummata isaatiitti waan qabatamaan gadi bahan yaamichi lammummaa godhameef.

3. Gama gulantaa siyaasa Oromootiin THBO jabeessuu fi gama Hawaasa Jabeessuutiin Ijaarsota hundee Oromummaa kan ta’an waldaalee akka Maccaa fi Tuulamaa Jajjabeessuu, safuu Sirna Gadaa kabajuu fi wal-jalaa dhagahuu, wal-jala deemuu, walii abboomamuu, ilaaf ilaameen rakkoolee xixiqqoon furamtee rakkina walootti akka xiyyeeffatamu irra deddeebi’amee ibsamee jira.

Oromummaan Haa-dursitu!
Tokkummaan Saba Oromoo Ni Jabaata!
Oromoon Ni Mooha!

Bitootessa 23, 2008 OCM International/ SDO Koreelee Shanan Gadaa Idil Addunyaa.